طعني في صميــــــــــم القلب
لي صاحبٍ صب الخطايا في عروقي ثم ضـاق
لين امتليت امن الجروح وضاق صدري مرتيـن
مره عشان اني خسرته وانكتـب هـم الفـراق
ومره عشان انه طلع مقلـب وشرْبتـه السنيـن
ويـلاه ياحمـل الهزيمـه والغـدر والاختنـاق
لاشالها صدر الصديـق وعـوّد الدايـن مديـن
ويـلاه ياويـلاه ياويـلاه حـمـلٍ مايـطـاق
اليا اكتشفت ان الثمين المحتـرم ماهـو ثميـن
وانك ضحيه من ضحايا الصدق بيديـن النفـاق
وانك غبي ماتعرف اوصاف الهزيل امن السمين
وان الصداقه نبت والوقت الردي راعـي نيـاق
وان المبادي والعلـوم الغانمـه ماضـي دفيـن
ياصاحبي حطمتني وانهالـت الذكـرى سيـاق
تهاوت صروح المحبـه والغـلا فـي دمعتيـن
والله حسيبك ولا انا مالي علـى مثلـك وثـاق
والله يعوضني بخيـر ويجبـر الكسـر ويعيـن
روح وانا بالقى على المريخ مجهـول النطـاق
صديق وافـي للصديـق يعيننـي دنيـا وديـن
اليا فرحت يزيدني فرحه ولا من ضقت ضـاق
ويحوش عن صدري هموم الوقت والعمر الحزين
واليا وقعت يشيلني واليـا دعيتـه جـا سبـاق
واليا نخيته ما تخلا وان فـزع لـي مـا يليـن
واليا بردت يشبّ لي في خاطره حزمـة عنـاق
وان حاصرتني مشكله ينصب لهـا ميـة كميـن
واليا ذكرت بشرّ ياقـف دون لحمـي لا يـذاق
واليـا عطانـي لا يـزنّ ولا يمـنّ ولا يهيـن
واليا بـدر منـي خطـا مـا ردهـا للافتـراق
ما يبحث عيوبي عليّه من يسـار ومـن يميـن
واليا شكيت وضاقت الدنيـا وبـان الاحتـراق
صندوق يحفظ سري الخافـي ولا يمكـن يبيـن
واليا عطيته فالصـدر خيمـه عموديـن ورواق
بنى لي بصدره قصر عالـي وسـور ونخلتيـن
هذا الصديق اللي عليه العلـم ياوقـت الشقـاق
ماهو هذاك اللي طعني فـي صميمـي طعنتيـن
واللي خلق سبع الاراضي فوقها سبـع الطبـاق
مايغبـن الرجـال فـي حياتـه الا حاجتـيـن
بعـد المآسـي والمواجـع والمهانـه فالعـراق
والهم والموت الحمر والذل فـي مخيـم جنيـن
الا القريب اللي يوقّف له علـى ركبـه وسـاق
ولاّ الصديق اللي يبيعـه مـن سبايـب كلمتيـن
هذي حكاية قلب غافـل فالزمـان ودوب فـاق
على جريمة قتل (مفهـوم الصداقه)مـن يديـن
الصاحب اللي صب موتي في عروقي ثم ضـاق
لين امتليت من الجروح وضاق صدري مرتيـن
أ تمنى تكــ ووو ـــــــــن قد نالت إعجابـــــــــــكم ،،
السبت فبراير 21, 2009 3:42 am
